السوشيال ميديا مش بس ضحك وفيديوهات وحبكات هزلية. ورا الكواليس فيه لعبة كبيرة وخطيرة شغالة طول الوقت… اسمها غسيل الأموال.
اللعبة دي مش بتحصل في أفلام الأكشن بس، دي بتحصل دلوقتي على موبايلك، في بيتك، وإنت ممكن تبقى جزء منها من غير ما تعرف.
غسيل الأموال يعني الفلوس جايه من طريق غلط… تجارة ممنوعة، سرقة، رشاوي… اثار او سلاح  والمجرم عايز يخليها تبان "نظيفة" قدام القانون.
زمان كانوا بيعملو ده بشركات وهمية ومشاريع كدابة. دلوقتي، السوشيال خلت الموضوع أسهل وأسرع.
إزاي بيحصل من وراء السوشيال ميديا؟
المجرم يشحن عملات أو هدايا افتراضية على منصات  السوشيال ميديا زي تيك توك، يوتيوب، فيسبوك Gaming، أو حتى ألعاب أونلاين 
الهدايا تتبعت لحسابات معينة (شركاء أو واجهات).

. صاحب الحساب على السوشيال ميديا يسحب الفلوس على البنك أو بايبال، وتبان أرباح من "دعم الجمهور" أو "البث المباشر".
. الفلوس المشبوهة بقت في عين القانون فلوس نظيفة… وهوب، العملية خلصت.
في مصر  شبكات بتستغل تيك توك لغسيل ملايين من خلال البث المباشر والهدايا.
في آسيا عصابات بتغسل فلوسها عن طريق شراء "ستارز" على فيسبوك Gaming وبعتها لحسابات تابعة ليهم.
في أوروبا  بيع عملات ألعاب أونلاين زي Fortnite في السوق السوداء وتحويلها لفلوس نقدية.
في أمريكا  بيع NFT مالهاش قيمة بأسعار فلكية لغسيل ملايين.
ممكن حد يبعتلك هدية أو فلوس وتفتكرها "كرم" أو "شغل أونلاين"، وهي في الحقيقة جزء من عملية غسيل أموال.
البنوك والجهات الأمنية مش هتفرق لو كنت متورط عن قصد أو بالغلط… النتيجة حسابك يتجمد، اسمك يدخل القوائم السوداء، ومستقبلك يضيع.
المجرمين بيحبو الضحايا اللي "مش فاهمين اللعبة"، عشان يسهل يسيطرو عليهم.
السوشيال ميديا دلوقتي بقت ساحة حرب مالية، الرصاص فيها مش بيقتل الجسد… بيقتل حياتك.
الفلوس اللي تيجي لك بسهولة ممكن تبقى السم في العسل، والهدية اللي تفرحك ممكن تكون الحبل اللي يشنقك.
لازم نخلي بالنا مفيش حد بيوزع فلوس وانت لو دخلت في الشرك دخ ممكن تخسر مستقبلك وسمعتك ولو لعبت اكتر ممكن تفقد حياتك انت واسرتك الناس دي مش بتلعب 

شاهد المزيد حول غسيل الأموال عن طريق السوشيال ميديا