حل الفنان كريم فهمي ضيف على برنامج كلمة أخيرة والذي تقدمه الإعلامية لميس الحديدي على شاشة قنوات أون، وذلك بعد تألقه ونجاحه الكبير في مسلسل وتقابل حبيب الذي تم عرضه في رمضان 2025.

كريم فهمي: كنت متخوف من إعادة التعاون بيني وبين ياسمين عبد العزيز 

وقال كريم فهمي في تصريحات رصدها موقع تحيا مصر: النجاح بالنسبالي لحظي ومرتحتش إلا بعد عرض 30 حلقة من العمل وكل يوم كنت بحس نجاح وتقابل حبيب اكتر ولكن كنت متخوف جدا من إعادة التعاون بيني وبين ياسمين عبد العزيز وان الجمهور هيشوفنا مع بعض تاني وكمان تكرار التعاون مع السيناريست عمرو محمود ياسين وغيره.

وتابع كريم فهمي حديثه عن رفضه مسلسل وتقابل حبيب في البداية، قائلا: بعد ونحب تاني ليه مكنش في كلام بيني وبين حسام شوقي خالص وأما عمرو محمود ياسين كلمني قولتله أما حسام شوقي يكلمني وقعدنا شهر محدش كلمني لحد ما قولت مش هعمل المسلسل ده خلاص وبعدين لقيت حسام شوقي بيكملني بيقولي تعالى في المكتب عندي وطلعنا ضحكنا ورغينا وهزرنا ومضيت على بياض وبعدين حصل اللي حصل.

كريم فهمي عن ياسمين عبد العزيز: كاريزما ماشية على الأرض 

وقال كريم فهمي متحدثا عن ياسمين عبد العزيز: كاريزما ماشية على الأرض وعلاقتي بيها غريبة جدا احنا صحاب أوي بس طول الوقت ناقر ونقير وبنختلف كتير وساعات في التصوير نقفش مع بعض ونقعد أسبوع منكلمش.. هي نقطة تحول في حياتي وجدعة وبميت راجل هي كل حاجة وعكسها.

 عن ظهوره كضيف شرف في مسلسل إش إش رغم وجوده بطلا في مسلسل وتقابل حبيب، قال كريم فهمي: مش بفكر فيها كدة خالص ومعنديش الحسابات دي.. أنا بعمل أي حاجة في أي وقت وأما محمد سامي كلمني قالي عايزك تطلع معايا في إش إش وافقت فورا

كريم فهمي عن زوجته داليا: كنت رومانسي معاها زي فارس أبو العزم

وتتحدث مريم فهمي عن زوجته داليا، قائلا: 90٪ من نجاحي هي السبب فيه واستحملت كتير اوي، آمنت بيا كمؤلف وبتحبني كمؤلف أكتر من إني ممثل كانت بتغير أول ما بدأت تمثل لكن دلوقتي لا مفيش خلاص هي بتختار معايا كل حاجة في أعمالي وممكن مكنتش أنجح في الاختيار لولاها، وبتدخل في اختيار لبسي وأي شيء يخصني فهي حاجة كبيرة اوي وبقالنا 12 سنة متجوزين وكنت رومانسي معاها زي فارس أبو العزم.