ردت الفنانة مي عمر على الاتهامات التي وجهت لمسلسلها "إش إش" بنشر أفكار تهدم المجتمع ومخالفة قوانينه.

وقالت مي عمر خلال لقائها ببرنامج "تفاعلكم": أنا أرفض أني أقدم أي حاجة مخالفة لقوانين المجتمع أو بتهدم أفكاره، وأتحدى أي حد يقولي أن المسلسل بيهدم قيم المجتمع، يمكن الفكرة دي كانت اتاخدت لما شافوا البرومو وأخدوا جملة وقالوا إيه دا، لكن لما يتفرجوا على المسلسل هيلاقوا أن الجمل بتتقال في سياق آخر.

وتابعت مي عمر: إحنا عندنا قصة اجتماعية مفيش أي حاجة خادشة ولا مشهد خادش، وحتى الرقص معمول باحترام شديد والبدل معموله باحترام شديد، إحنا بنحترم المجتمع والجمهور وعاملين مسلسل بجد فيه دراما حلوة.

وعن لغة الحوار بين الأبطال في المسلسل قالت مي عمر: الألفاظ هو في الآخر مجتمع مختلف مجتمع راقصات فأكيد ليهم لغة مختلفة غير لو عملتي محامية أو دكتورة، هما ليهم اللغة بتاعتهم اللي لازم تستخدميها عشان تحسي باختلاف الشخصية، لو خليتها تتكلم زي "نعمة" أو أي دور عملته هيبقى إيه الفرق، لكن المسلسل عدى على الرقابة وواخد تصنيف (+18)، مينفعش حد يتفرج ويقول أصل بنتي عندها 5 سنين فسمعت لفظ، حتى الألفاظ مفيش حاجة جريئة أو خادشة لكن هي مناسبة مع البيئة اللي عايشين فيها.

وتنفس مي عمر في رمضان 2025، بمسلسل إش إش، حيث تقدم الفنانة فيه دور راقصة شعبية، تمر بالعديد من الظروف العصيبة، وطوال الحلقات تحاول أن تنجو من الحياة التي تعيش فيها.

أبطال مسلسل "إش إش"

مسلسل "إش إش" من بطولة مي عمر، ماجد المصري، انتصار، إدوارد، هالة صدقي، دينا، شيماء سيف، طارق النهري، عصام السقا، علاء مرسي، محمد الشرنوبي، ندى موسى، إيهاب فهمي، حمدي هيكل، أحمد عبدالله، وعدد من ضيوف الشرف وهم: محمد ممدوح، خالد الصاوي، كريم فهمي، محمد عبدالرحمن، أحمد زاهر، والعمل من تأليف وإخراج محمد سامي.