زوجة تطلب الخلع من زوجها بسبب الحلويات

سردت زوجة قصتها مع زوجها قائلة: "أنا متجوزة من حوالي سنتين ونص لما كان عمري 26 سنة وكل شوية إهانة ويقول عليا فاشلة وكل ده عشان مش بعرف أعمل حلويات في البيت لا كيكة ولا بسبوسة ولما حاولت اتعلم اتريق عليا قدام أهلي وأهله وشكلي بقى وحش وكنت مكسوفة».

 

وتابعت الزوجة في قصتها مع زوجها «محمود اتقدم لي من حوالي 4 سنين عشان يتجوزني وأهلي وافقوا على الجواز واتخطبنا على أننا نتجوز في خلال سنة لكن حصل ظروف والجواز اتأجل 6 شهور، وبعدها عملت فرح الناس كلها حضرته وكان حلو وفي بداية الجواز كانت الأمور طبيعية».

 

أكملت الزوجة في قصتها مع زوجها «بعد حوالي 9 شهور من الجواز كان بيطلب مني أعمل حاجات حلوة في البيت وكنت بقوله أنا مش بعرف خلينا نشتريها من برا عشان الحاجة ماتبوظش ويقولي حاولي ولما أحاول يروح يتريق عليا عند أهله وأهلي ويقول ولا بتعرف تعمل أي حاجة ولا بتعرف تعمل أكل».

 

قالت الزوجة: «تعبت من طريقة التريقة والهزار بتاعه قدام أهلي ومنظري قدام أهله وكل شوية يقولي اتعلمي حتى كنا بناكل برا في الشارع والمحل كان زحمة وقدام الناس بصوت عالي قالي اتعلمي تعملي اي حاجة حلوة شايفة الأكل الناس كلها بتعمل وأنتي فاشلة وأنا مستحملتش».

 

واختتمت الزوجة قائلة «في النهاية أنا تعبت منه وقولت أنا مش هستحمل وروحت بيت أهلي وحاولت معاه لكن هو زي ما هو لا أهله ولا أهلي عرفوا يحلوا ويغيروا من طريقته وطلبت من الإنفصال في هدوء لكن هو موافقش روحت محكمة الأسرة عشان أرفع قضية خلع».

يمكنك مشاركة الخبر علي صفحات التواصل